Четири градилишта на територијата на Општина Центар се санкционирани во изминатата недела поради оставање градежен материјал и шут на јавни површини.
Инспекциските служби изрекле глоби во висина од 1.300 до 1.800 евра, поради прекршување на правилата за одржување на комуналниот ред и јавната чистота.
Од Општина Центар посочуваат дека оставениот градежен материјал и отпад го отежнувале движењето на пешаците и непреченото одвивање на сообраќајот.
„Нашите инспектори се на терен и будно ја следат состојбата на активните градилишта. Контролите продолжуваат, а особено внимание посветуваме на одржувањето на чистотата и непреченото користење на јавниот простор. Секој што нема да ги почитува прописите ќе биде соодветно санкциониран“, порача градоначалникот на Општина Центар Горан Герасимовски.
Од Општината апелираат до инвеститорите и градежните компании да не ги узурпираат јавните површини, да ги почитуваат законските обврски и да овозможат безбедно и непречено движење на граѓаните.
Инспекциските контроли на градилиштата на територијата на Општина Центар продолжуваат со засилен интензитет.