Да се најде појадок кој истовремено е брз, вкусен и хранлив може да биде предизвик, особено во динамичните утра. Овесните снегулки често се избор поради влакната и придобивките за здравјето на срцето, но постои и едноставна алтернатива која може да се подготви уште претходната вечер.
Кардиологот д-р Ларс Сøндергард како една од опциите го препорачува чиа-пудингот со ореви. „Потребен е минимален напор за подготовка, а обезбедува многу омега-3 масни киселини кои го поддржуваат срцевиот ритам и циркулацијата“, изјавил тој за „Параде“.
Комбинација богата со омега-3 масни киселини
Чиа-семките и оревите содржат алфа-линоленска киселина (АЛА), растителна форма на омега-3 масна киселина. Според Сøндергард, АЛА може да помогне во намалувањето на воспалителните процеси и нивото на триглицериди, а може и благо да го намали крвниот притисок.
Чиа-семките се богати и со растителни влакна.
„Исклучително се богати со растворливи и нерастворливи влакна и обезбедуваат слични придобивки како овесот кога станува збор за намалување на холестеролот и одржување на стабилно ниво на шеќер во крвта“, објаснил д-р Сøндергард.
Пудингот се подготвува така што чиа-семките се мешаат со млеко или растителен напиток и се оставаат преку ноќ за да ја впијат течноста. Наутро може да се додадат ореви, со што се добива брз појадок богат со влакна и незаситени масти.