Премиерот Христијан Мицкоски вели дека од претстојната средба меѓу шефот на дипломатијата Муцунски и бугарската министерка Петрова во Софија не очекува голем исчекор. Според него, во овој момент може да се очекува дијалог, но не и конкретен резултат.
Без големи очекувања Владата гледа на претстојната средба на министерот за надворешни работи Муцунски со бугарската колешка Петрова во Софија. Премиерот Христијан Мицкоски оцени дека состанокот може да донесе разговор, но не и посуштински напредок.
„Во овој момент може да се очекува дијалог, но не и конкретен резултат“, порача Мицкоски. Тој додаде дека очекува „некој дијалог на пуласајд, ние така го викаме, на коњопој“. Премиерот беше и поостар во оценката за можниот исход, велејќи: „Еве ќе бидам повторно дипломатски некоректен, а имајќи го предвид однесувањето на официјална Софија, не очекувам потврда, не очекувам ништо. Очекувам некој дијалог пуласајд, ние така го викаме на коњопој и тоа отприлика да биде тоа“.
Од опозицискиот СДСМ, пак, велат дека е неприфатливо однапред да се подгрева атмосфера во која разговорите со источниот сосед би пропаднале уште пред да започнат. Според социјалдемократите, „неприфатливо е подгревање на атмосфера и стратегија“ разговорите да не успеат уште на самиот почеток.
Во партиската реакција се наведува и дека во наредниот период ќе следи „повторно иницирање разгорување на темата Бугарија, злоупотреба на историјата, нова злоупотреба на историјата“ со цел, како што велат, да се најде „ново оправдување за неуспехот којшто е пред нас“ и објаснување „зошто не можеве оваа влада да направи исчекор кон Брисел“.
Средбата меѓу Муцунски и Петрова е најавена за в четврток во Софија, на маргините на Меѓународната министерска конференција за Коридорот 8. Барањето за разговор, според информациите од прилогот, било испратено од македонска страна.
Иницијативата следува откако претседателката на Европската комисија, Урсула фон дер Лајен, при посетата на Скопје го посочи директниот дијалог како прв чекор во обидот да се придвижи евроинтегративниот процес. Во таков контекст, средбата во Софија се гледа како можност за отворање комуникација, иако од македонскиот државен врв засега не се испраќаат очекувања за позначаен напредок.