Промената на сите три соја во препорачаниот состав на вакцината против сезонски грип за северната хемисфера годинава предизвика доцнење во производството на глобално ниво, информираше министерот за здравство Сашо Клековски.
Тој посочи дека ваквата истовремена промена на сите три соја е невообичаена, поради што во повеќе европски земји и земји од регионот вакцинацијата се очекува да започне во ноември.
Клековски информираше дека во Македонија тендерот за набавка на вакцини вообичаено се објавува во периодот од јуни до август, по објавувањето на препорачаните соеви од Светската здравствена организација. Сепак, на годинашниот тендер не се пријавил ниту еден понудувач.
Поради тоа, Министерството за здравство веднаш презело активности за обезбедување на вакцините по друг пат.
„Во последните три сезони вакцинацијата кај нас започнуваше во периодот од 16 до 25 октомври. Министерството за здравство ќе биде подготвено вакцинацијата да започне и оваа сезона во истиот период“, рече Клековски.
Од планираните 80.000 дози, 56.000 вакцини веќе се обезбедени или се во постапка на обезбедување, додека активностите за обезбедување на преостанатите количини продолжуваат.
Бесплатната вакцина против сезонски грип е наменета за приоритетните групи – лица над 65 години, хронично болни, бремени жени и здравствени работници.
Од Министерството за здравство најавуваат дека граѓаните навремено ќе бидат информирани за почетокот на вакцинацијата и начинот на закажување.