Илон Маск го претстави новиот електричен спортски автомобил Roadster, за кој тврди дека може да лета, да се движи наопаку и да забрзува од нула до речиси 100 километри на час за помалку од една секунда. Спектакуларната демонстрација се одржа во Тексас, а производството е најавено за 2028 година.
Компанијата „Тесла“ во четвртокот вечерта го претстави новиот Roadster, спортски автомобил со две седишта, развиен во соработка со компанијата „Спејс Икс“. На тест-полигонот во Тексас, автомобилот изведе маневри кои досега најчесто можеа да се видат во научнофантастичните филмови.
За време на демонстрацијата, Roadster се искачи по стрмна закривена рампа, се движеше превртен наопаку, а потоа се одвои од конструкцијата, се преврте во воздухот и безбедно слета на тркалата со помош на специјални воздушни млазници.
Во друг дел од презентацијата, автомобилот прескокна неколку паркирани возила на „Тесла“, по што беше прикажано и неговото екстремно забрзување од нула до 60 милји на час, односно приближно 97 километри на час, за помалку од една секунда.
Според Маск, ваквите можности се резултат на технологија што користи десет млазници и резервоари со воздух под екстремно висок притисок. Системот овозможува дополнителен потисок при забрзување, но и краткотрајно подигнување на автомобилот од земјата.
Демонстрацијата беше изведена без возач во автомобилот, поради безбедносни причини.
„Успехот не е загарантиран. Навистина го мислам тоа. Веројатно ќе успее, но ако не успее, ние сме на безбедно растојание“, изјави Маск пред присутните.
Тој нагласи дека необичната презентација била организирана пред публика за присутните лично да се уверат во можностите на возилото, а не да се сомневаат дека станува збор за снимки создадени со вештачка интелигенција.
Но, дали Roadster навистина може да лета?
И покрај спектакуларните сцени, експертите предупредуваат дека прикажаните маневри не претставуваат доказ дека автомобилот е способен за вистински, континуиран лет на поголеми растојанија.
Роџер Конор, кустос за вертикално летање во Националниот музеј за воздухопловство и вселена „Смитсонијан“, за Си-Ен-Ен објаснува дека комбинирањето автомобил и летало носи сериозни инженерски предизвици.
Според него, леталата мора да бидат што е можно полесни, додека автомобилите имаат потреба од тешки безбедносни конструкции, браници и зони за апсорбирање удари.
„Не зборуваме за континуиран лет. Буквално зборуваме за скокање“, оценува Конор.
Дополнително, останува отворено прашањето дали ваквите технологии ќе добијат дозвола за користење на јавните патишта.
Маск најави дека сериското производство на новиот Roadster треба да започне во 2028 година. Сепак, оваа најава доаѓа по повеќегодишни одложувања на проектот, кој првпат беше претставен уште во 2017 година.
Иако демонстрацијата покажа импресивни технолошки можности, засега нема доказ дека идните сопственици ќе можат со Roadster да патуваат низ воздухот како со вистинско летало.
Со тоа, „Тесла“ направи чекор кон концептот на летечки автомобил, но останува да се види дали технологијата ќе прерасне во практично и безбедно превозно средство.