Речиси две години по исчезнувањето на двегодишната Данка Илиќ, судскиот процес за нејзината смрт продолжува со нови тврдења од одбраната. Дејан Драгијевиќ и Срѓан Јанковиќ, обвинети за убиството на девојчето, денеска пред Вишиот суд во Неготин се изјаснија дека не се виновни, тврдејќи дека претходните признанија ги дале под физичка и психичка принуда.
Во речиси четиричасовното изнесување на одбраната, двајцата обвинети ги отфрлија наводите дека го сториле кривичното дело. Данка исчезна на 26 март 2024 година во Бањско Поље кај Бор, а нејзиното тело и понатаму не е пронајдено.
„Не го признавам злосторството бидејќи не го сторив“, изјави Драгијевиќ пред судечкиот совет. Јанковиќ, пак, рече: „Не признавам, бидејќи дури и не го видов детето“.
Драгијевиќ тврдеше дека за време на полициското испрашување бил тепан и изложен на закани со цел да признае убиство што, како што наведува, не го извршил.
„Ме тепаа со стап, ми ставија вреќа на главата, ме удираа со стап по табаните, ме плеснаа… Бев исплашен, целиот бев црн. Ме заканија дека ќе ме убијат ако не признаам, а јас немав што да признаам“, рече тој.
И Јанковиќ изнесе слични тврдења, наведувајќи дека бил изложен на тортура, дека имал скршени ребра и дека бил задушуван. Тој тврдеше и дека полицајците му се заканувале со неговиот син и четиригодишната внука.
Станува збор за наводи на обвинетите кои треба да бидат предмет на утврдување во соодветна постапка. Вишото јавно обвинителство во Ниш претходно покрена посебна постапка и уапси седум полицајци под сомнение за злоупотреба и тортура врз обвинетите.
На денешното рочиште судечкиот совет го одби заедничкиот предлог на одбраната и застапникот на семејството Илиќ за исклучување на јавноста од расправата. Судот оценил дека јавноста е основен принцип на кривичната постапка