Одлуката на Граѓанскиот суд да го забрани штрајкот на Струковиот синдикат на контролори на летање (ССКЛ) е целосно законски основана и донесена од искусен судија, изјави денеска Горан Николоски, овластен застапник на М-НАВ А.Д.. На прес-конференција, тој ги отфрли обвинувањата на синдикатот и го изнесе ставот на Управниот одбор на М-НАВ дека целата акција е „лична одмазда“ на претседателот на ССКЛ, Александар Тасевски.
Николоски нагласи дека барањето на М-НАВ се однесувало конкретно на најавениот штрајк и не претставувало забрана за синдикално делување во иднина. Според него, судот правилно утврдил неколку клучни точки:
- Нема барања од работен однос: Известувањето за штрајк не содржело конкретни барања за заштита на права од работен однос.
- Нема легитимитет: ССКЛ е регистриран само како подружница на Независниот синдикат за сообраќај и врски и како таков нема правен субјективитет самостојно да организира штрајкови. „Во регистарот на синдикати никаде не е запишана ССКЛ“, посочи Николоски.
- Завршен штрајк од 2023: Штрајкот од 2023 година, на кој се повикува синдикатот, е веќе завршен и прекинат со Спогодба, па не може да се реактивира без нова постапка и конкретни барања за тоа што од Спогодбата не е исполнето.
Адвокатот ги отфрли и тврдењата дека Тасевски не бил известен за постапката, наведувајќи дека известувањето било испратено на четири мејл адреси и дека поканата за рочиште била веднаш доставена.
Николоски го пренесе и ставот на УО на М-НАВ дека причините за штрајкот се нејасни, бидејќи компанијата нуди високо ниво на заштита на работничките права, и дека целата ситуација е резултат на лична одмазда на Тасевски. „Прашајте го Тасевски каде бил вработен неговиот татко, дали во М-НАВ…, каде бил вработен неговиот дедо, неговиот брат, и дали кога неговата ќерка и брат не успеале да влезат кај него се создава желба за лична одмазда“, рече Николоски, алудирајќи на непотизам и лични фрустрации како мотив.
