Австрија од почетокот на конфликтите на Блискиот Исток ги одбила сите барања на САД за воени прелети преку својот воздушен простор, соопшти „Ројтерс“, повикувајќи се на политика на неутралност што земјата ја практикува од 1955 година.
Портпаролот на Министерството за одбрана, Михаел Бауер, истакна дека секое барање за прелет се разгледува поединечно, но кога се работи за држава вклучена во војна, дозвола не се издава. Одлуките се носат во координација со Министерството за надворешни работи, со цел да се зачува доследноста на неутралниот статус на земјата.
Австрија, која географски е опкружена со земји-членки на НАТО, повторно потврди дека останува верна на принципите на неутралност, одбивајќи да дозволи користење на својот воздушен простор за воени операции.
Сличен став зазеде и Швајцарија, која уште во средината на март објави дека нема да дозволи нејзиниот воздушен простор да се користи за воени активности, исто така повикувајќи се на долгогодишната политика на неутралност.
Овие одлуки ја истакнуваат конзервативната и непристрасна позиција на двете централноевропски земји во текот на меѓународните конфликти.
