АРХЕОЛОЗИТЕ откриле приватен спа комплекс во Помпеја каде посетителите и гостите се капеле пред да се впуштат во раскошни гозби, објавено е денеска на една италијанска веб-страница, а пренесува АФП. Бањите откриени во римска вила се еден од најголемите приватни термални комплекси некогаш откриени во антички град во близина на Неапол, уништен од ерупцијата на Везув пред речиси 2.000 години.
Археолозите заклучиле дека посетителите се соблекле во специјална соблекувална која, судејќи по клупите пронајдени таму, може да собере до 30 луѓе. Потоа би се релаксирале во калидариумот, просторија со топла бања, потоа во тепидариумот, топла соба и на крајот се нуркале во базен со ладна вода во фригидариумот. Ладната соба е многу импресивна. Се состои од 10 метри долг двор со трем, во чиј центар се наоѓа голем базен“, опишуваат археолозите.
По уживањето во спа-третманот, гостите вечераа под светлина на свеќи во салата чии ѕидови беа црни и украсени со фрески на кои се прикажани сцени од грчката митологија. Салата и термалниот комплекс се дел од големата вила на која две години работеа археолозите.
Вилата била погодна за организирање раскошни дочеки, веројатно и политички
Директниот премин од термалната област во големата социјална просторија сугерира дека римската вила била погодна за организирање раскошни банкети, се наведува во соопштението. Ваквите банкети веројатно беа драгоцена можност за неговиот сопственик да обезбеди изборен консензус на своите гости, да ја промовира кандидатурата на пријател или роднина или едноставно да го потврди својот социјален статус. По застрашувачката ерупција на Везув во 79 година од нашата ера, пепелта, лавата и карпите што се спуштија придонесоа бројните градби на Помпеја да се сочуваат речиси во првобитната состојба до денес.
Вкупниот број на жртви не е познат, но управата на археолошкиот локалитет Помпеја открива дека за време на ископувањата биле пронајдени посмртните останки на повеќе од 1.000 жртви, совршено сочувани и оковани во неколку слоеви пепел што паднал врз градот. Наводно, во времето на вулканската ерупција, во Помпеја живееле околу 13.000 жители. Остатоците од градот биле откриени дури во 16 век, а организираните ископувања започнале околу 1750 година.
Во последно време, вниманието е насочено кон напорите да се запре влошувањето и уривањето на вредните градби. Денес, Помпеја е под заштита на светското наследство на УНЕСКО и е второто најпосетувано туристичко место во Италија, по Римскиот Колосеум.
