Поради војната меѓу Украина и Русија и неодамнешното случајно соборување на цивилен азербејџански патнички авион, ЕУ издаде предупредување дека цивилни авиони не треба да летаат над западниот дел на руската територија. Ер Србија сè уште има редовни летови кои летаат над територија зафатена од војна.
Агенцијата за воздухопловна безбедност на Европската унија (ЕАСА) денеска предупреди на „зголемени ризици“ за авионите кои летаат над Русија поради некоординација со војската, што се покажа, како што се наведува, во неодамнешната несреќа на азербејџанскиот авион.
Во известувањето за безбедноста во конфликтните зони, EASA ја повтори својата препорака до авиокомпаниите да не летаат низ западниот руски воздушен простор, што Москва претходно го забрани за превозниците со седиште во ЕУ, но кој сè уште го користат авионите од Кина, Турција, Индија, Персискиот Залив и други.
Зоната за која станува збор се наоѓа „западно од 60-от источен меридијан на сите височини и сите нивоа на летови“, додава европската агенција, која без оглед на мерките што ги презема Русија, препорачува избегнување прелети на дел од таа територија од почетокот на Руската инвазија на Украина во февруари 2022 година
Во новото известување, агенцијата посочува дека конфликтот создава ризици за цивилните авиони кои ненамерно можат да станат цели, поради можна некоординација меѓу цивилните и воените власти, кога се активира противвоздушната одбрана.
Се однесува на трагичниот случај на летот 8243 на Азербејџан ерлајнс.
Триесет и осум лица загинаа во падот на тој авион, кој летал меѓу Баку и Грозни, главниот град на руската република Чеченија, на 25 декември.
Во меѓувреме, Ер Србија е единствената авиокомпанија која не ги прекина летовите кон Русија од почетокот на војната.
Ер Србија ја прекина продажбата на билети за летовите од Белград до јужните руски градови Казан и Сочи. Одлуката уследи по сличните активности преземени од други авиокомпании по трагичната несреќа на Азербејџан ерлајнс Ембраер Е190, за кој се верува дека по грешка бил соборен од руската противвоздушна одбрана. Според системот за резервации на Ер Србија, последниот лет на авиокомпанијата до Казан е закажан за 19 јануари, додека последниот лет за Сочи е закажан за 20 јануари.
Суспензијата на овие линии се очекува да остане во сила најмалку до крајот на зимската сезона 2024/25 на крајот на март, објави Здружението на тур-оператори на Русија.
Српскиот авиопревозник одржува само два неделни лета до Казан и Сочи. Во претходните години, Ер Србија беше принудена да ги прекине летовите кон Краснодар и Ростов на Дон, кои подоцна беа заменети со Сочи и Казан.
Сепак, иако ги прекинува летовите кон Сочи и Казан, авионите за Москва и Санкт Петербург ќе продолжат да летаат според планираното. Летот до Санкт Петербург во голема мера ги заобиколува областите зафатени од војна на Русија и Украина, но летот до Москва, иако ја заобиколува Украина, сепак оди преку делови од западна Русија.
