Американски функционер денеска изјави за Ројтерс дека американскиот претседател Џо Бајден се очекува да објави нови санкции кои ќе влијаат на руската економија до крајот на неделата, како дел од мерките за зајакнување на воените напори на Киев против Москва пред Доналд Трамп да влезе во Белата куќа.
Администрацијата на Бајден, исто така, подготви нова воена помош во вредност од 500 милиони долари за Украина, вклучително и ракети за противвоздушна одбрана, муниција воздух-земја и опрема за поддршка на борбени авиони Ф-16, изјави американски официјален претставник кој сакаше да остане анонимен.
Враќањето на Трамп во Белата куќа на 20 јануари ги подгреа надежите за дипломатско решение и крај на агресијата на Москва против Украина, но и стравувањата во Киев дека брзото постигнување мир ќе има висока цена.
Советниците на Трамп презентираа предлози за ставање крај на војната во Украина, што подразбира отстапување на големи делови од земјата на Русија.
Соработниците на Бајден, пак, велат дека сакаат Украина да има најдобра можна позиција на бојното поле, за да и биде подобра позицијата во евентуалните преговори со Русија.
Американскиот функционер исто така рече дека нема детали за санкциите што Бајден ќе ги воведе во последните денови како претседател, додавајќи дека соработниците на Бајден ги информираат Трамповите за тоа што преземаат.
Тој исто така рече дека поголемиот дел од оружјето и муницијата ветени на Украина се веќе доставени, а остатокот е на пат. Тој додаде дека резервите на муниција на Украина сега се добри.
Американскиот функционер исто така рече дека на Украина можеби и требаат безбедносни гаранции, вклучително и потенцијално членство во НАТО, за да спречи иден руски напад по мировните преговори.
Во меѓувреме, американските воени претставници ги проучуваат операциите на Северна Кореја во војната во Украина. Се верува дека илјадници војници од Северна Кореја ги поддржуваат Русите во таа војна.
Американскиот функционер, исто така, рече дека САД најверојатно ќе санкционираат повеќе кинески субјекти поради нивните напори да ја поддржат Русија.
Американскиот министер за финансии Џенет Јелен минатиот месец изјави за Ројтерс дека Вашингтон продолжува да се обидува да ги намали руските приходи од нафта и пристапот до странските резерви за војната во Украина.
