Чантата „Џејн Биркин“ станува најскапата во светот

Чанта што е родена од практична потреба на познатата актерка и пејачка Џејн Биркин стана најскапата чанта некогаш продадена на аукција – за огромни 10 милиони долари. Иако изгребана, избледена и носена секојдневно, оваа чанта Хермес Биркин сега има иконски статус во светот на луксузот.

Црната кожна чанта што легендарната Џејн Биркин ја носеше речиси секој ден од 1985 до 1994 година е продадена преку аукциската куќа „Сотби“ за 8,6 милиони евра (околу 10 милиони долари, вклучувајќи ги даноците). Оваа чанта е првата чанта Биркин што некогаш е направена – и онаа што го даде името на една од најпознатите и најпосакуваните модни икони.

Интересно е што оваа чанта не е ни блиску до совршено зачувана – напротив, таа е полна со знаци на употреба, вклучувајќи гребнатини, дамки и избледување од налепниците на хуманитарните организации „Лекари на светот“ и УНИЦЕФ. Но, токму овие знаци на секојдневна употреба ја прават посебна.

„Славно“ минато

Приказната за чантата Биркин започнува во 1984 година кога Џејн Биркин, мајка на три деца, случајно се нашла до тогашниот претседател на Хермес, Жан-Луј Дима, во авион. Му се пожалила дека не може да најде доволно голема чанта, па му нацртала скица на торба за повраќање. Уште следната година, Хермес ѝ го испратил првиот примерок од чантата што ќе ја носи со години.

Во текот на својот живот, Биркин добила уште четири вакви чанти и приходите од користењето на нејзиното име, кои редовно ги донирала во добротворни цели. Оригиналната чанта претходно ги менувала сопствениците и била изложена во престижни музеи како што се MoMA во Њујорк и Музејот Викторија и Алберт во Лондон.

Сегашниот рекорд поставен од оваа аукција значително ги надминува претходните продажби на луксузни чанти, вклучувајќи ја и „Diamond Himalaya Birkin“, која беше продадена во 2022 година за околу 450.000 долари.

Според „Сотбис“, чантата „Џејн Биркин“ има уникатни карактеристики кои никогаш не биле реплицирани во подоцнежните верзии – од димензиите, металните елементи, до украсите за нокти што Џејн ги користела затоа што сакала да има уредно потстрижени нокти.

Иако многу колекционери денес ги чуваат чантите „Биркин“ во беспрекорна состојба како инвестиција, оригиналот е роден од практична потреба – правејќи ја оваа чанта уште повредна во очите на колекционерите.

Џејн Биркин, која почина во 2023 година, еднаш на шега рече дека луѓето најверојатно ќе ја паметат по чантата што го носи нејзиното име. Се чини дека била во право.