Најмалку три авиони, од кои два на компанијата „Виз ер“, кои вечерва требаше да слетаат на Меѓународниот аеродром Скопје, беа принудени да ја променат рутата и да се упатат кон Приштина. Причина за хаосот во авиосообраќајот е опасен метеоролошки феномен познат како „смикување на ветерот“ (wind shear), кој претставува сериозен ризик при слетување.
Во раните вечерни часови, патниците кои патуваа кон главниот град на Македонија се соочија со неочекувани проблеми.
Според првичните информации, летовите на „Виз ер“ од Берлин (W64740) и Ајндховен (W64716), со очекувано време на пристигнување околу 18:20 и 18:50 часот, не добиле дозвола за слетување. Пилотите биле информирани од контролата на летање да ја продолжат рутата кон аеродромот во Приштина како алтернативна дестинација.
Набргу потоа, и авионот што сообраќаше од Цирих се соочи со истите проблеми и не успеа да слета во Скопје, приклучувајќи се на другите пренасочени летала.
Што е „смикување на ветерот“ и зошто е опасно?
Причината за овие ограничувања, како што потврдуваат метеоролошките податоци, е појавата на „wind shear“ или силно смикување на ветерот во реонот на аеродромот.
Овој феномен претставува ненадејна и нагла промена на брзината или правецот на ветерот на кратко растојание. Ваквите промени се особено опасни за воздухопловите во критичните фази на лет – полетување и слетување. Кога авионот е на мала висина и со релативно мала брзина, наглото губење на ветерот од напред (челен ветер) или наглата појава на ветар од зад грб (грбен ветер) може драстично да влијае на силата на подигање (lift) и да ја загрози безбедноста на леталото.
Поради ваквите ризични услови, Контролата на летање најверојатно издала ограничувања за приоѓање и слетување како стандардна безбедносна мерка, сè додека условите не се стабилизираат.
Иако засега не се очекуваат други значајни временски промени во следниот период, ситуацијата на скопскиот аеродром останува под буден надзор. Пренасочувањата најверојатно ќе предизвикаат и доцнења кај летовите што треба да полетаат од Скопје со овие воздухоплови.
