И покрај амбициозните планови на Европската унија до 2035 година целосно да ја забрани продажбата на нови автомобили со мотори со внатрешно согорување, најновите податоци покажуваат драматичен пресврт на пазарот на електрични возила. Новата анализа на Европската асоцијација на производители на автомобили (ACEA) откри поразителни податоци – електричните возила сочинуваат само 1,8% од вкупно 249 милиони автомобили на европските патишта.
Посебно загрижува фактот што пазарниот удел на електричните возила во 2024 година падна од 14,6% на 13,6%.
Овој пад доаѓа и покрај бројните владини субвенции, даночни олеснувања и други стимулации што земјите од ЕУ ги нудат за купување електрични автомобили.
Инфраструктурата и цената сè уште се главните предизвици
Експертите посочуваат дека една од клучните причини за бавната транзиција кон електрични возила е недоволната инфраструктура за полнење. Во многу делови на ЕУ, особено во руралните области, мрежата за полнење сè уште е недоволно развиена, што создава таканаречена „анксиозност за опсегот“ кај потенцијалните клиенти.
Друг важен фактор е цената. Просечниот електричен автомобил сè уште е значително поскап од споредлив модел со конвенционален мотор, што, во комбинација со моменталната економска ситуација, одвраќа многу купувачи.
Старите автомобили се подолго и подолго на патот
Податоците покажуваат дека Европејците ги чуваат своите автомобили подолго и подолго – просечната старост на возилата во ЕУ достигна 12,5 години. Грција води со просечна старост на флотата од 17,5 години, додека Луксембург има најмлада флота со просек од 8 години.
Посебно е интересен податокот дека Италијанците имаат најмногу автомобили по глава на жител – дури 694 возила на 1.000 жители. Од друга страна, во Летонија тој број е значително помал и изнесува 381 возило на 1000 жители.
Производителите се соочуваат со големи предизвици
Автомобилската индустрија се соочува со сериозни предизвици во исполнувањето на строгите еколошки прописи. Фолксваген неодамна изрази загриженост дека може да плати казна од 1,5 милијарди евра за надминување на дозволените емисии во 2025 година.
