Жителите на Струмица и околните општини отсега можат да добиваат помош при користење на 350 електронски услуги на едно место. Во општинската зграда е отворен новиот Центар за услуги – ЕТУ Струмица, кој е 18-ти ваков центар во земјава.
Центарот го посетија министерот за дигитална трансформација Стефан Андоновски и градоначалникот на Општина Струмица Петар Јанков.
Услугите се достапни преку Националниот портал за електронски услуги uslugi.gov.mk, а граѓаните ќе можат да добијат и непосредна помош од вработените во центарот.
Андоновски истакна дека отворањето на центарот е резултат на соработката меѓу Министерството за дигитална трансформација и локалната самоуправа, која го обезбедила просторот.
„Како што ветивме во текот на кампањата и како што разговаравме со градоначалникот, Струмица е во фокусот на Министерството за дигитална трансформација. Големо е задоволството што тука го отвораме 18-тиот Центар за услуги во Македонија. Во одлична соработка со локалната самоуправа, нашите вработени сега се достапни да им ги понудат 350-те услуги од Националниот портал на граѓаните од Струмица и од целиот регион“, изјави Андоновски.
Според министерот, центарот е наменет и за граѓаните кои немаат можност, не сакаат или не знаат самостојно да ги користат електронските услуги од својот дом.
„Секој граѓанин кој не е во можност или не знае како да користи електронски услуги од дома, тоа ќе може да го направи тука, во Центарот за услуги. Уверението за државјанство, потврдите за неосудуваност, за кривична и казнена евиденција, изводите од матичните книги на родени, венчани и умрени, како и услугите од Агенцијата за катастар, се достапни на едно место во Струмица“, нагласи министерот.
Градоначалникот Јанков се заблагодари за соработката со Министерството за дигитална трансформација и изрази очекување таа да продолжи и во иднина. Тој ги повика граѓаните да ги користат услугите на центарот, за кои посочи дека ќе им заштедат време и ќе го олеснат добивањето на потребните документи.
Покрај обезбедувањето пристап до електронските услуги, Центарот има и едукативна функција. Граѓаните ќе можат да добијат насоки и помош за самостојно користење на дигиталните услуги.
Андоновски посочи дека соработката со Општина Струмица продолжува и преку други проекти за подобрување на дигиталната достапност.
„Намената на центарот е и едукативна, а соработката со општините не запира тука. Во Струмица реализиравме и две зони за бесплатен интернет преку проект на ГИЗ и Европската Унија. Во периодот што следи, граѓаните треба да очекуваат новини од соработката на Министерството со општините, секако и со Општина Струмица“, рече Андоновски.
Министерот најави дека до крајот на годината треба да бидат отворени вкупно 20 центри за услуги. Следни на листата се Ресен, Кичево и Гостивар.
„Целта е до крајот на мандатот да стигнеме до секој граѓанин. Ветив дека до крајот на годината ќе имаме 20 вакви центри за услуги и тоа ќе го исполниме. Следни се Ресен, Кичево и Гостивар, со што веќе покриваме најголем дел од градовите во Македонија. Од пролет најавувам и кампања за руралните средини, за електронските услуги да ги доближиме до сите граѓани, бидејќи само во тој случај дигиталните услуги се корисни“, порача Андоновски.