Светската здравствена организација (СЗО) жали за одлуката на американскиот претседател Доналд Трамп да ги повлече САД од глобалната агенција и се надева дека тој ќе се премисли, додека ЕУ изразува загриженост поради најавата за повлекување и, исто така, се надева дека одлуката се уште се разгледува.
„Се надеваме дека САД ќе преиспитаат и навистина се надеваме дека ќе има конструктивен дијалог за доброто на сите, за Американците, но и за луѓето ширум светот“, рече портпаролот на СЗО Тарик Јашаревиќ на брифинг со новинарите во Женева.
За време на неговиот прв ден на функцијата во понеделникот, Трамп го исполни своето предизборно ветување дека ќе стори се што е во негова моќ за да го прекине американското членство во агенцијата на ОН со седиште во Женева.
Сепак, тоа нема да се случи веднаш. Неговата администрација, исто така, мора писмено да го извести генералниот секретар на ОН за повлекувањето. Потоа ќе треба една година да стапи на сила. „Светската здравствена организација жали поради најавата дека Соединетите Американски Држави имаат намера да се повлечат од организацијата“, се вели во соопштението на СЗО.
„СЗО игра клучна улога во заштитата на здравјето и безбедноста на луѓето ширум светот, вклучително и Американците, со решавање на основните причини за болеста, градење посилни здравствени системи и откривање, спречување и реагирање на здравствени итни случаи, вклучително и појава на болести, често на опасни места каде што другите не можат да одат“.
САД се најголемиот придонесувач за СЗО
САД се убедливо најголемиот придонесувач за СЗО. Во 2023 година нејзиното учество во буџетот беше 18 проценти. СЗО ќе анализира што би значело повлекувањето на САД за нејзините програми, соопшти агенцијата, додавајќи дека е премногу рано да се даваат детали.
Гневот на Трамп кон СЗО датира од пандемијата на коронавирус. Уште за време на неговиот прв мандат, тој се обиде да ги натера САД да ја напуштат организацијата, но Џо Бајден стана претседател пред крајниот рок од една година и ја откажа наредбата на Трамп.
Трамп ја обвинува СЗО за злоупотреба на средства и лошо управување со пандемијата.
Портпаролот на кинеското Министерство за надворешни работи во вторникот рече дека Пекинг е „загрижен“ од извршната наредба на Трамп, додека германскиот министер за здравство го нарече удар за меѓународната борба против глобалната здравствена криза.
Европската унија изрази загриженост поради најавата на Трамп за повлекување од Светската здравствена организација, рече портпаролот, додавајќи дека ЕУ се надева дека одлуката сè уште се разгледува.
„Со загриженост гледаме на најавата за повлекување на Соединетите држави од СЗО и веруваме дека американската администрација ќе го разгледа сето ова пред официјалното повлекување“, изјави за новинарите портпаролот на Европската комисија.
