ФОТО Силувал девојка на улица во Германија – полицијата го бара напаѓачот, му испаднала влечката

Германската полиција интензивно бара маж кој нападнал и силувал 20-годишна девојка во приморскиот центар Гремиц, во округот Остхолштајн. Злосторството се случило под закрила на ноќта, а полицијата сега бара помош од јавноста за идентификување на сторителот. Истражителите објавија фотографија од осомничениот, објавува Bild.de.

Нападот се случил ноќта помеѓу 11 и 12 август годинава, околу 1 часот по полноќ, на улицата Хафкамп. Непознат маж, кој наводно возел велосипед, одеднаш ја нападнал младата жена. На местото на злосторството биле пронајдени влечки „Адидас“, за кои се верува дека ги испуштил напаѓачот.

Девојката храбро и енергично се бранела од напаѓачот, а според полициските проценки, веројатно го повредила. Се верува дека сторителот можеби има видливи повреди на лицето, горниот дел од телото или рацете, што би можело да помогне во неговата идентификација.

Бидејќи досегашната истрага не даде резултати, криминалистичката полиција во Нојштат објави фото-робот составен врз основа на изјавата на жртвата. Портпаролката на полицијата потврди за БИЛД дека се надеваат дека објавувањето на фото-роботот ќе ги охрабри граѓаните да пријавуваат клучни информации.

Бараниот човек е опишан како лице високо околу 1,70 метри и старо над 30 години. Фото-роботот ќе биде дистрибуиран и преку постери низ целиот Гремиц.