Германската министерка за европски прашања и клима Ана Лирман вечерва изјави дека нејзе и на нејзината делегација и се заканувале со насилство од претставниците на претседателот на Република Српска (РС) Милорад Додик.
„Денес бев во Бања Лука, во Босна и Херцеговина. Тоа е убав град со одлични луѓе. Луѓето што ги запознав таму ме пречекаа топло. Имав серија одлични средби со граѓанското општество и опозицијата“, објави Ана Лирман во видео пораката на Инстаграм.
Таа посочи дека Додик кон крајот на посетата на Бања Лука „повторно го покажал својот деструктивен пристап“.
„Неговите претставници ни се закануваа на мене и на мојата делегација со насилство. Ова е знак на слабост“, нагласи германскиот министер, додавајќи дека „сецесионистичките постапки на Додик се неприфатливи“.
На крајот таа изјави дека од Бања Лука добила многу пораки за поддршка од луѓе кои, како што истакна, се срамеле од постапките на Додик.
„Имам јасна порака до сите луѓе во РС – ќе продолжиме да стоиме покрај вас, на вашиот пат кон просперитет, стабилност и ЕУ“, заклучи Ана Лирман.
Владата на РС денеска ја прогласи германската министерка Ана Лирман за „персона нон грата“ во тој ентитет во Босна и Херцеговина, по што таа ја прекина посетата на Бања Лука и ја напушти РС.
Владата на РС соопшти дека ваквата одлука е донесена затоа што Германија, заедно со Австрија, поради нивните сецесионистички дејствија, им забранила на Додик, на претседателот на Парламентот на РС Ненад Стевандиќ и на премиерот на РС, Радован Вишковиќ да влезат во тие земји.
