Денес го славиме Свети Сисој Велики, кој во нашиот народ е почитуван и ценет од мајките и жените затоа што го сметаат за голем заштитник на децата и помошник во секоја тага и неволја.
Затоа со овој светец се поврзуваат голем број обичаи.
Многу мајки практикуваат пост 7 дена пред овој празник за да се причестат, а овој „седумдневен пост“ е непишано правило кое почнува да го почитува се поголем број мајки. Се верува дека така нивните малечки ќе бидат здрави и дека ќе ги следи среќата во животот.
Ако врне дожд на овој ден, мајките ќе ги остават своите деца темелно да се навлажнат бидејќи се верува дека оваа вода ја праќа Свети Сисој од небото и дека од неа ќе пораснат нивните деца.
Постарите велат дека Свети Сисој е најголемиот истребувач од сите ѓаволи кои ги напаѓаат децата. Затоа се верува дека на овој ден децата можат да останат надвор навечер, бидејќи сите демони бегаат и се кријат.
Народот вели дека се што ќе се раѓа на овој ден ќе биде среќно и долговечно.
Кој бил Свети Сисој Велики?
Родум Египќанин и ученик на свети Антониј. После смртта на својот голем учител свети Сисој се насели на пустинската гора наречена Антониева според местото на подвигот на великиот светител. Земајќи врз себе тешки подвизи толку се скроти самиот себеси, што стана незлоблив како јагне.
Затоа Бог му даде голема благодат. Можеше да исцелува болни, да изгонува демони и да воскреснува мртви. Свети Сисој се подвизуваше шеесет години во пустината и беше како извор на жива мудрост за сите монаси и мирјани што му притекнуваа барајќи поука. Пред смртта лицето му заблеска како сонце.
Монасите стоеја околу него и ѝ се восхитуваа на оваа појава. А кога светителот ја испушти душата, одајата се исполни со прекрасно благоухание. Се упокои во длабока старост, во 429 година. Ги учеше свети Сисој монасите: „Какво искушение и да го снајде човекот, тој треба да ѝ се предаде на волјата Божја и да признае дека искушението се случило заради неговите гревови. Ако пак се случи нешто добро, треба да се каже дека станало по Божја Промисла“.
Еден монах го праша авва Сисој: „Како да Му угодам на Бога и да се спасам?“ Му одговори светителот: „Ако сакаш да Му угодиш на Бога, излези од светот, оддалечи се од земјата, остави ја тварта, пристапи кон Создателот, соедини се со Него со молитва и со плач и ќе најдеш спокојство и во овој и во оној век“. Друг монах го запраша авва Сисој: „Како да го достигнам смирението?“ Му одговори Светителот: „Кога некој ќе се извежба да го признава секој човек за подобар од себеси, ќе го стекне со тоа смирението“.
Амон му се жалел на Сисој дека не може да ги запомни мудрите изреки што ги прочитал и да ги повтори кога разговара со луѓето. Му одговорил светителот: „Тоа не е нужно. Потребно е да се стекне чистота на умот и да се зборува од таа чистота, полагајќи ја надежта во Бога“.
