Нов протест против апсењето на опозицискиот градоначалник Екрем Имамоглу се одржува вечерва во Истанбул, а луѓето почнаа да се собираат во паркот Сарачане со силно полициско присуство.
Демонстрантите шетаат со турски знамиња, слики од првиот претседател на земјата Мустафа Кемал Ататурк и постери со различни слогани, извици и запалени факели.
Полицијата го блокирала преминот што води кон авенијата Ататурк со оклопни возила стационирани под сводовите на аквадуктот, јавува дописникот на РИА Новости од Истанбул.
Имамоглу, кој е обвинет дека е поврзан со група која се занимава со корупција, мито и помагање на терористички активности, денеска пред судот даде петчасовно сведочење во кое ги отфрли сите обвинувања.
Имамоглу е главниот опозициски лидер и според некои анкети има поголема поддршка од турскиот претседател Реџеп Таип Ердоган.
Главната Републиканска народна партија го осуди апсењето на Имамоглу како политички мотивирано и ги повика приврзаниците да одржат демонстрации во согласност со законот.
Имамоглу беше уапсен во средата за време на рација во неговата резиденција, само неколку дена пред да се очекува да биде номиниран за претседателски кандидат на опозициската Републиканска народна партија на прелиминарните избори во недела.
Од апсењето на Имамоглу, илјадници луѓе се собраа во градското собрание на Истанбул на ноќни собири, а дојде до судири меѓу демонстрантите и полицијата во Истанбул, турската престолнина Анкара и третиот по големина турски град Измир.
