Кандидатот за градоначалник на Град Скопје од ВМРО-ДПМНЕ, Орце Ѓорѓиевски, најави голем инфраструктурен проект што, како што рече, ќе ја промени сообраќајната иднина на градот. Првата фаза опфаќа проширување на булевар „Македонија“ и улицата „Даме Груев“ во булеварско решение.
– Ова е вистински пресврт за центарот на Скопје. Новите кружни тека кај „Нова Македонија“, „Кочо Рацин“ и „Железничка“ ќе донесат побезбеден и поефикасен проток, според европски стандарди – изјави Ѓорѓиевски.
Тој најави дека со пуштањето во употреба на подземната сообраќајница под „Лимак“, Скопје ќе добие прва подземна улица со шест ленти – четири за автомобили и две за автобуси.
– Со ова решение центарот ќе биде значително растоварен, а движењето низ градот побезбедно и покомфорно – додаде тој.
Ѓорѓиевски најави и изградба на современа катна гаража во Буњаковец и нови монтажни паркинзи во Капиштец и Под Кале.
На настанот присуствуваше и кандидатот за градоначалник на Центар од Движењето ЗНАМ, Мирослав Лабудовиќ, кој рече дека заедно имаат јасна визија за развој на градот и дека ќе работат на подобрување на хигиената, безбедноста, паркирањето и вклученоста на младите.
