Рудните богатства што ги поседува Македонија можат да бидат клучен фактор за економскиот развој на државата. Но, наместо да се искористат паметно и стратешки, ние се соочуваме со регулаторни бариери, политички интереси и дезинформации кои ја кочат рударската индустрија.
Во моментов, светската цена на златото е на историски рекорди, а Македонија поседува ресурси кои би можеле да донесат милионски приходи, пишува во својата последна колумна аналитичарот и рударски инженер, Виктор Грозданов.
„Цената на златото вртоглаво расте. Во моментов, една унца (29,8 грама) достигна цена од 2.900 евра, а се очекува да ја помине границата од 3.000 евра по унца. Тоа значи 100 евра за грам. Оваа информација е клучна во контекст на нашето рудно богатство. Она што јас, но и сите кои следат случувањата на пазарот на минерални суровивини, забележуваме интересен тренд: најголемата побарувачка за злато во моментов доаѓа од САД. Само во декември, од Швајцарија во Америка биле префрлени 64 тони злато. На прв поглед, ова изгледа нелогично, но е поврзано со стравот од протекционистички мерки и одлуки кои го прават златото безбедно засолниште за инвеститорите. Каде е Македонија во оваа слика? Клучното прашање е: зошто Македонија не ги искористува своите рудни потенцијали во полза на својата економија“, пишува Грозданов во колумната „Сите лаги за рудниците (3): Златото, рудниците и вистината која ни ја кријат“.
Тој наведува дека Науката и технологијата овозможуваат екстракција на минерали на еколошки начин, со нови, безбедни методи како тиосулфатната постапка и смета дека наместо слепо да се отфрла рударството поради митови и стравови, неопходно е транспарентно да се дискутираат сите можности.
„Што треба да направи Македонија? Македонија мора да се фокусира на паметно искористување на своите ресурси, без да дозволи манипулации од страна на политички и економски интереси, како онаа група лажни еко активисти, кои работат против националниот развој. Потребни се научни анализи и транспарентна дискусија за реалните можности за развој на рударската индустрија.За крај, Македонија има огромен потенцијал во рударството, кое може да биде двигател на економскиот развој и подобрување на инфраструктурата“, вели Грозданов во својата колумна.
Според Грозданов, ако сакаме Македонија да има економски суверенитет, мора да ги искористиме ресурсите што ги имаме.
