Холандската влада на 1 ноември започна голема повеќегодишна кампања насловена „Denk vooruit“ (Размисли однапред), која се емитува на ТВ, радио и на интернет, со цел да ја подготви јавноста за можни вонредни состојби.
Главната порака на кампањата е граѓаните да бидат подготвени за сценарио до 72 часа (три дена) без вода, струја или интернет.
Властите предупредуваат дека поради геополитичките случувања и климатските промени, шансата за вонредна состојба е поголема, поради што е важно општеството да стане поотпорно. Иако сè повеќе луѓе веќе се подготвени, сепак тоа не е доволно.
„Секој ден се потпираме на секојдневните удобности како струја и вода од чешма. Но, што правите ако струјата одеднаш се исклучи и нема вода од чешмата, и тоа трае со денови?“, изјави привремениот министер за правда и безбедност, Ван Остен.
Тој нагласи дека во итна ситуација, на помошта може да се чека подолго.
„Со кампањата покажуваме колку е важно да можете да се грижите за себе и за своето домаќинство. Со пакет за итни случаи, план или разговор со семејството или соседите, обезбедувате мир во итна ситуација… И владата и бизнисот се подготвуваат. Но, потребна е акција од сите… Тоа што го правите денес, нè прави посилни утре“, порача министерот.
Првите 72 часа сте сами
Кампањата, координирана од Националниот координатор за борба против тероризам и безбедност (НЦТВ), појаснува дека во случај на голема криза, владата и службите за итни случаи ќе бидат распоредени таму каде што се најпотребни.
Тие не можат да бидат секаде одеднаш. Поради тоа, повеќето луѓе првите 72 часа ќе бидат препуштени сами на себе.
Неодамнешното истражување нарачано од НЦТВ покажува дека за повеќето Холанѓани, прашањето не е дали ќе се случи вонредна состојба, туку кога ќе се случи.
Три чекори за подготовка
Кампањата „Размисли однапред“ им помага на граѓаните да се подготват во три клучни чекори:
- Подгответе пакет за итни случаи (со вода, храна, батерии, лекови итн.)
- Направете план за итни случаи (каде да одите, како да комуницирате).
- Разговарајте меѓусебно и помагајте си.
На веб-страницата www.denkvooruit.nl, граѓаните можат да најдат конкретни совети и упатства како да се подготват, како и објаснувања за тоа кои ризици постојат во Холандија.
