Платформата „SuportKocani“ ја објави статистиката за третата распределба на донациите наменети за лицата погодени од трагедијата во Кочани. Иако фокусот е ставен на солидарноста и помошта, бројките откриваат дека сериозен дел од хуманитарните средства завршуваат во државната каса преку персоналниот данок на доход (ПДД).
Трета распределба: Помош од дијаспората
Во рамки на последната фаза, распределени се вкупно 3.153.204 денари (бруто износ). Овие средства се донација од „Македонската православна епархија за Европа“, а беа реализирани без банкарски провизии преку соработка со НЛБ Тутунска банка.
Помошта е распределена на 142 лица кои потпишале изјави за потреба од помош:
- 123 лица добиле по 15.968 денари (нето).
- 19 лица добиле по 45.992 денари (нето).
Само за оваа трета распределба, на име персонален данок (ПДД) се исплатени вкупно 315.292 денари.
Милионски суми за данок на доход
Највпечатлив податок во извештајот е вкупниот биланс од сите три досегашни распределби. Имено, од вкупно собраните 22.742.997 денари во бруто износ, државата на име персонален данок наплатила дури 2.274.285 денари.
Ова значи дека приближно 10% од секоја донација наменета за настраданите граѓани се одлева како давачка кон државата, што повторно го отвора прашањето во јавноста за потребата од законски измени или даночни олеснувања кога станува збор за директна хуманитарна помош по големи несреќи.
Од платформата нагласуваат дека целиот процес е спроведен со максимална отчетност и во координација со засегнатите страни, со единствена цел помошта да стигне до секој на кој му е потребна.
