Илон Маск, еден од најблиските советници на актуелниот американски претседател Доналд Трамп, истакна дека се надева дека ќе воспостави трговска зона без царини меѓу САД и Европа, пишува Би-би-си.
„Се надевам дека ќе се согласат дека и Европа и САД ќе се движат, барем според мене идеално, кон систем без царини, кој во суштина би создал слободна трговска зона меѓу Европа и Северна Америка“, рече Маск, кој зборуваше преку видео врска до Конгресот на италијанската десничарска партија Лига во Фиренца.
Тој додаде дека заедно со укинувањето на царините треба да се овозможи полесно движење на луѓето меѓу континентите.
„Јас сум и за поголема слобода за луѓето да се движат меѓу Европа и Северна Америка доколку сакаат. Тоа, на крајот на краиштата, беше мојот совет до претседателот“, рече Маск.
Се чини дека ова е првата изјава на Маск за царините, откако Трамп најави нови (за некои земји и големи) царини за стоки од речиси целиот свет.
Маск ја искористи можноста да ги критикува регулативите на ЕУ, велејќи дека тие го задушуваат претприемништвото.
„Поради строгите европски регулативи, Европа не е добро место за започнување нов бизнис“, рече Маск.
