ИСТОРИЈА: Сашко Кедев е првиот Македонец кој ги освои сите 14 врвови над 8.000 метри!

Нов историски подвиг за македонскиот спорт и алпинизам! Д-р Сашко Кедев, утрово во Пакистан, успешно се искачи на врвот Гашербрум I (8.080 м) и со тоа стана првиот Македонец кој ги има освоено сите 14 врвови над 8.000 метри, како и највисоките врвови на секој од седумте континенти.

Искачувањето се случи во 10:44 часот по локално време, како дел од експедицијата на „Imagine Nepal“, предводена од искусни непалски водичи. Покрај Кедев, на врвот се искачија Ванг Жонг од Кина, како и непалските алпинисти Дава Гјалје Шерпа и Нгима Нуру Шерпа.

„Ова е круната на долгогодишната алпинистичка кариера на д-р Кедев – со Гашербрум I тој го затвори кругот од сите 14 осумилјадници, нешто што ретко кој во светот го има постигнато,“ соопшти тимот на „Imagine Nepal“.

Гашербрум I, познат и како Hidden Peak, е 11-тиот највисок врв на планетата и важи за еден од технички најтешките. За Кедев, ова беше последниот предизвик во неговиот алпинистички маратон, започнат пред две децении.

Со ова, д-р Кедев влегува во тесниот круг на најелитните светски алпинисти – луѓе кои успеале да ги освојат:

Сите 14 врвови повисоки од 8.000 метри, и сите највисоки врвови на седумте континенти (т.н. Seven Summits, меѓу кои Еверест, Аконкагва, Денали и Килиманџаро).

Со денешниот успех, Македонија добива свој пионер во светскиот врв на алпинизмот, а д-р Кедев уште еднаш потврдува дека границите постојат само за да бидат поместени.