Меленото месо е основна состојка на многу јадења, како што се шпагети Болоњезе, лазањи или ќофтиња. Меѓутоа, често се случува при неговото подготвување да направиме грешки кои можат да влијаат на вкусот и текстурата на садот.
Во продолжение прочитајте ги петте најчести грешки кои луѓето ги прават при подготовка на мелено месо и како да ги избегнат, пренесува Danas.rs.
Месо од супермаркет
Месото што го купуваме во повеќето супермаркети често не се прави од најсвежи парчиња месо. Исто така, не е секогаш можно со сигурност да се знае од кои делови од месото е направено. За да бидете сигурни во свежината и квалитетот на месото, подобро е сами да изберете парче месо во месарница и месарот да го сомеле пред вас.
Избирате месо со премалку маснотии
Луѓето често се одлучуваат за мелено месо со малку маснотии мислејќи дека тоа е поздрав избор. Сепак, месото со премалку маснотии може да биде суво и без вкус, особено кога се користи во рецепти за кои е потребно подолго готвење, како што се сосови или супи. Наместо тоа, изберете месо со малку поголема содржина на маснотии, како што е меленото говедско месо со околу 15-20% маснотии, така што вашето месо ќе биде посочно, а храната ќе има побогат вкус.
Месото го ставате на тавата директно од фрижидерот
Кога ладно мелено месо се става директно на тавата, може да дојде до нерамномерна и нецелосна термичка обработка на месото, што може да биде опасно поради потенцијална бактериска контаминација. Наместо тоа, почекајте неколку минути месото да дојде на собна температура пред да го ставите на тавата. Ова ќе обезбеди рамномерна термичка обработка и ќе го намали ризикот од болести предизвикани од храна.
Премногу мешате додека месото се готви
Премногу честото мешање може да ја оштети структурата на месото и да ги испари сите негови сокови. Ова ќе предизвика парчињата месо наместо да бидат сочни, да се претворат во суви грутки. За да ја избегнете оваа грешка, прво оставете го месото да порумени од едната страна пред да го промешате и оставете го да се свари без премногу мешање.
Месото не го готвите доволно долго
Кога подготвувате оброци со мелено месо, важно е целосно да се загрее за да се избегне ризикот од труење со храна. Месото треба да достигне внатрешна температура од најмалку 71 °C, со цел да се уништат сите потенцијално опасни бактерии. Користете дигитален термометар за храна за да бидете сигурни дека месото е готово пред сервирање.
