Директорот на Бирото за јавна безбедност при МВР Александар Јанев на својот инстаграм профил порача дека секој полициски службеник, без исклучок, мора да работи за тоа што е платен со парите од граѓаните!
„Се појавија информации за непрофесионално однесување на одредени полициски службеници.
Не отстапуваме од нашата одлучност за чесно, професионално и со висок интегритет извршување на полициската должност. Максимално транспарентно и посветено се проверуваат сите околности на (не)постапувањето на полициските службеници во двете ситуации за кои јавноста оправдано реагира.
Полицијата е тука да ги спроведува законите фер и без исклучоци, да ги брани правата на сите, без разлика на потекло или припадност. Никој, без разлика на неговата позиција, не е над законот! Никој не смее и нема да дозволиме да отстапува од кодексот и постапување со етичност и интегритет. Секое однесување што ја нарушува довербата на граѓаните треба и ќе биде откриено и санкционирано.
Апелирам до сите чесни и совесни граѓани да се приклучат во откривање на секое несовесно, неодговорно или непрофесионално работење на кој било припадник на полицијата. Заедно, да ја изградиме полицијата како вистински сервис за народот, а не како сила која владее со него“, вели Јанев.
