Градоначалникот на Штип, Иван Јорданов, остро реагира по серијата вандалски инциденти во централното градско подрачје, каде во изминатите денови биле уништени новогодишни светилки, оштетени садници и урбана опрема. Јорданов оцени дека ваквото однесување претставува директен удар врз заедничкото добро и врз вложувањата на Општината.
Тој упати апел до СВР Штип да преземе соодветни мерки и санкции против сторителите, нагласувајќи дека нарушувањето на јавниот ред и оштетувањето на имотот ја загрозуваат безбедноста и ја деградираат урбаната средина.
Градоначалникот побара и поголема свесност од граѓаните, повикувајќи на заедничка грижа за јавниот простор и заштита на инвестициите во градот. Според него, Штип може да биде поубав и поуреден само доколку секој поединец покаже одговорност и реагира кога ќе забележи уништување на јавен имот.
„Нашиот град е наш дом и наша обврска е да го чуваме“, порача Јорданов.
