Зимските услови со екстремни ниски температури, снег што се топи и повторно замрзнува, како и ледени дождови, честопати создаваат проблеми при отворање на автомобилските врати. Водата што се задржува меѓу гумените заптивки и каросеријата или во самата брава лесно се претвора во мраз, што може целосно да го блокира отворањето на вратата.
Кога вратата на автомобилот не може да се отвори, најпрво треба да се утврди дали замрзнувањето е во гумената заптивка или во бравата. Ако клучот влегува и се врти, но вратата останува затворена, проблемот обично е во залепените гумени делови. Експертите предупредуваат дека не смее да се применува сила, бидејќи тоа може да предизвика пукање на гумата или оштетување на вратата.
Наместо тоа, се препорачува нежно притискање на надворешната страна на вратата или внимателно потчукување по лимот, со што мразот може да се ослободи. Добра практика е да се проверат и другите врати на автомобилот, бидејќи понекогаш совозачката врата се отвора полесно. Во краен случај, може да се користи млака вода, загреана до околу 50 степени, која внимателно се полева по рамката на вратата. Врела вода не се препорачува поради ризик од оштетување на бојата или пукање на стаклото од наглата промена на температурата.
Ако проблемот е во замрзната брава, најбезбедно решение е користење на средство за одмрзнување. Како алтернатива, може да се користи средство за дезинфекција со алкохол или клучот да се загрее со запалка и внимателно да се внесе во бравата за постепено одмрзнување. Одмрзнување со фен за коса не се препорачува, бидејќи топлиот воздух брзо се лади и ретко достигнува до замрзнатите делови, а може да предизвика оштетувања.
За превенција, експертите советуваат уште пред првите мразови да се исчистат и заштитат гумените заптивки со соодветни средства за нега. Домашни решенија како масло, путер или козметички креми не се препорачуваат. Благ заштитен слој спречува лепење на гумите, ги штити од сушење и пукање и го намалува ризикот од замрзнување. Бравите може дополнително да се заштитат со графит или редовно подмачкување.
