„Денес навистина е среден“, беше првата реченица на актуелниот американски претседател Доналд Трамп кога во петокот се сретна со украинскиот претседател Володимир Зеленски пред Белата куќа.
Трамп секако мислеше на препознатливата маица на Зеленски во воен стил, која ја носи од почетокот на руската инвазија во 2022 година.
Инаку, Зеленски е познат по своите маици откако се откажа од одела и вратоврски како солидарност за војниците на фронтот.
Темата за неговата појава повторно се појави во петокот кога за време на состанокот во Овалната соба, Трамп и неговиот потпретседател Џеј-Ди Венс го нападнаа украинскиот претседател пред камерите, а сето започна со прашање на американски новинар.
„Зошто не носите костум? Вие сте на средба со највисоката функција во оваа земја и одбивате да носите костум. Дали воопшто имате одело? На многу Американци им пречи вашето непочитување на достоинството на оваа функција“ гласеше прашањето на Брајан Глен, известувач на Глас на Америка Реал.
Видно уморен и иритиран, Зеленски одговори: „Ќе носам одело кога ќе заврши војната“, за потоа да додаде „Можеби нешто слично на твоето, да. Можеби нешто подобро, не знам. Можеби нешто поевтино“
Низ просторијата одекнала смеа, но јасно е дека прашањето за оделото е одраз на поширока жалба на дел од американската десница, која смета дека Зеленски не покажува доволно благодарност за американската помош, јавува Би-Би-Си.
Глен е инаку познат како голем поддржувач на Трамп и партнер на радикалната десничарска претставничка Марџори Тејлор Грин, една од најистакнатите републиканци на MAGA. Неговата телевизија Real America’s Voice, основана во 2020 година, е позната по ширење теории на заговор, вклучувајќи ги и оние за кражба на изборите во 2020 година, напад на Конгресот во 2021 година и QAnon.
По средбата, Глен напиша дека има „големи симпатии за Украинците“, но дека одбивањето да носи костумот го покажува „внатрешното непочитување“ на Зеленски кон САД.
И додека конференцијата продолжи со прашања за испраќање американско оружје во Украина, Трамп на крајот повторно се осврна на облеката: „Ми се допаѓа твојата облека“, рече тој, покажувајќи кон Зеленски.
Но, според американскиот Axios, работите биле поинакви во позадина. Белата куќа, наводно, побарала од Зеленски да облече одело и била навредена кога тој не го облекол.
Средбата траела уште дваесетина минути додека потпретседателот Венс не го прекинал разговорот и не упатил нови обвинувања за „непочитување“. Тој му се обраќаше на Зеленски со „Господине Претседател“, додека Зеленски му се обраќаше со „ЈД“.
„Мислам дека е грубо што доаѓате во Овалната соба и се обидувате да го решите ова пред американските медиуми, изјави Венс.
По ова дебатата ескалираше, а Зеленски, на крајот беше исфрлен од Белата куќа, додека односите меѓу САД и Украина паднаа на ново ниско ниво.
