Секој што ќе патува во Грција следното лето треба да знае дека возењето во алкохолизирана состојба може да резултира со сериозна парична казна, како и губење на возачката дозвола. Имено, новиот Закон за сообраќај во Грција, чија јавна расправа е отворена до 24 јануари, воведува строги санкции за прекршоци поврзани со тешки сообраќајни несреќи.
Како што е најавено, возачите чии нивоа во крвта се движат од 0,50 до 0,80 промили ќе платат казна од 150 евра и 20 дена ќе останат без возачка дозвола. Дозволата се враќа само по истекот на тој рок и со доказ за плаќање на глобата. За концентрација на алкохол од 0,80 промили до 1,10 казната е 700 евра, а возачката дозвола се одзема на 90 дена.
Во овој случај, прекршокот е класифициран како особено опасен за безбедноста на сообраќајот. Доколку концентрацијата на алкохол надмине 1,10 промили, казната достигнува 1.200 евра, а возачката дозвола се одзема на 180 дена. Дополнително, возачот може да се казни со затворска казна од најмалку два месеци, а јата на возилото се отстранува за период од 10 дена до 6 месеци.
Секој што ќе го повтори прекршокот се соочува со уште построги санкции, доколку возачот во рок од една година по втор пат биде фатен како вози под дејство на алкохол, ќе биде казнет со 1.000 евра, а ќе му биде одземена дозволата на 180 дена. Доколку концентрацијата на алкохол во крвта е над 1,10 g/l во случај на повторен прекршок, казната се зголемува на 2.000 евра, а лиценцата се одзема на две години. За трет прекршок во рок од пет години, возачот ја губи дозволата за седум години.
Во сите наведени случаи возилото е задолжително одземено и складирано, што ја отежнува ситуацијата за прекршителите. Со овие мерки Грција сака да го намали бројот на несреќи предизвикани од возење под дејство на алкохол и да ја зголеми безбедноста на патиштата.
