Кина ги обвини Соединетите Американски Држави за двојни стандарди и се закани со контрамерки откако претседателот Доналд Трамп најави дополнителни царини за увоз од земјата .
Портпаролот на кинеското Министерство за трговија денес за прв пат ја коментираше заканата на Трамп. „Прибегнувањето кон закани за високи царини не е правилен начин за соработка со Кина. Нашата позиција за царинска војна останува конзистентна – не ја сакаме, но не се плашиме од неа“, рече тој.
Тој додаде дека доколку САД продолжат со своите еднострани потези, Кина „решително ќе преземе соодветни мерки за да ги заштити своите легитимни права и интереси“. Пекинг ги повика САД „итно да го исправат својот погрешен пристап“ и да го зачуваат тешко постигнатиот напредок во разговорите меѓу кинескиот лидер Си Џинпинг и Трамп.
Портпаролот на Министерството за трговија ги опиша контролите на извозот на Кина како „легитимен потег“, обвинувајќи го Вашингтон за примена на двојни стандарди. „Долго време, САД го преоптоваруваа концептот на национална безбедност и ги злоупотребуваа контролите на извозот, усвојувајќи дискриминаторски мерки против Кина“, рече тој. Тој истакна дека Вашингтон вовел еднострани ограничувања за широк спектар на производи, вклучувајќи полупроводничка опрема и чипови. „Листата на американската контрола на извозот вклучува повеќе од 3.000 артикли – во споредба со нешто повеќе од 900 на листата на Кина“, додаде портпаролот.
Министерството го обвини Вашингтон за најновата ескалација на трговските тензии, велејќи дека администрацијата на Трамп вовела серија нови рестриктивни мерки против Кина само 20 дена по последната рунда разговори во Мадрид на почетокот на септември. Овие мерки вклучуваат додавање на нови кинески субјекти на листата за контрола на извозот, проширување на контролите врз подружниците на котираните компании и воведување посебни пристанишни такси за кинеските бродови.
Новите извозни ограничувања на Кина за ретки земни метали значително ќе го зголемат притисокот врз глобалните индустрии и синџирите на снабдување со технологија. Овие минерали се неопходни за производство на широк спектар на производи, од секојдневна електроника, полупроводници и автомобили до борбени авиони. Кина е водечки светски производител на овие критични суровини, што ѝ дава значителна предност во преговорите со Соединетите Американски Држави.
Неколку часа по заострувањето на контролата врз извозот на ретки минерали, Пекинг објави дека ќе почне да наплаќа такси за американските бродови што влегуваат во кинеските пристаништа од 14 октомври. Со тоа, тој возврати на новата американска царина за кинеските бродови што стапува на сила истиот ден. Според Центарот за стратешки и меѓународни студии, САД учествуваат само со 0,1% во глобалната бродоградба, во споредба со 53,3% на Кина.
Кинеското Министерство за трговија ја бранеше својата одлука како „неопходни пасивни одбранбени акции“, додавајќи дека потезите на САД „сериозно ја оштетиле атмосферата на економските и трговските преговори меѓу двете страни“.
Високи американски и кинески претставници се состанаа на трговски разговори во Женева во мај, нивни први откако Трамп започна глобална трговска војна. Средбата во Лондон во јуни донесе трговска „рамка“, додека третата рунда разговори еден месец подоцна донесе напредок. Најновите состаноци во Мадрид во септември донесоа „основен рамковен консензус“ за продажба на TikTok, во кинеска сопственост.
Трамп и Си разговараа по телефон на 19 септември, но не го финализираа договорот за TikTok. По повикот, Трамп објави дека ќе се сретне со Си на маргините на форумот за азиско-пацифичка економска соработка кон крајот на октомври во Јужна Кореја. Иако Кина не коментираше за идните состаноци, Трамп исто така најави посета на Кина на почетокот на следната година и пристигнување на Си во САД. Сепак, во петокот се закани дека ќе ја откаже претстојната средба со Си по најновите ограничувања на Кина.
