Струмичките општински власти во координирана акција со полицијата започнаа засилена борба против загадувачите на воздухот. Во изминатите денови се казнети вкупно десет лица кои биле затекнати како го загадуваат воздухот преку палење на отпад на отворено.
Според извештајот од акцијата, казните се поделени по два основа:
- Шест лица добиле глоби за прекршување на комуналниот ред.
- Четири лица биле фатени на дело додека гореле отпад на отворено.
Се гори отпад за да се извади бакар
Градоначалникот Петар Јанков посочи дека една од главните причини за палењето на отпадот во периферните делови на градот е илегалната трговија со секундарни суровини.
„Во акциите досега се запленети и околу 50 килограми бакар заради кој се гори секаков отпад во перифериите на градот од несовесни граѓани“, информираше Јанков.
Инспекции во фабрики и нови мерни станици
Битката за почист воздух продолжува и на институционално ниво. Општината соопшти дека инспекторите вршат засилени надзори и врз фирмите кои поседуваат Б-интегрирани еколошки дозволи.
Дополнително, за да се добие прецизна слика за изворите на загадување, локалната самоуправа најави технолошко опремување.
„Општината распиша набавка на шест нови мерни станици за да има увид во реално време каков е воздухот по одделни квартови во градот“, велат од општината, со што полесно ќе се лоцираат жариштата.
