Блиските соработници на американскиот претседател Доналд Трамп почнаа да го напаѓаат украинскиот претседател Володимир Зеленски.
Ова следува по вербалната пресметка пред камерите во Овалната соба меѓу Трамп, Зеленски и потпретседателот Џеј-Ди Венс
Главниот советник на Трамп, Мајк Волц, изјави дека на САД им е потребен лидер на Украина кој е подготвен да гарантира траен мир со Русија, но дека не е јасно дали украинскиот претседател Володимир Зеленски е подготвен да го стори тоа.
Валц вели дека Вашингтон сака да гарантира траен мир меѓу Москва и Киев кој вклучува територијални отстапки во замена за безбедносни гаранции, а за нив е задолжена Европа.
„Она што го велам е дека оваа војна треба да заврши, а тоа ќе бара територијални отстапки. Ова ќе бара руски отстапки за безбедносните гаранции“, рече тој.
Запрашан дали Трамп сака Зеленски да поднесе оставка, Валц изјави за Си-Ен-Ен дека им е потребен лидер кој знае да се справи со нив.
„Потребен ни е лидер кој може да се справи со нас, и на крајот со Русите, и кој може да стави крај на оваа војна. Ако стане очигледно дека личните или политичките мотиви на претседателот Зеленски се разликуваат од целта – завршување на борбите во неговата земја, мислам дека имаме реален проблем“, додаде Валц.
И претседателот на Претставничкиот дом, Мајк Џонсон, даде до знаење дека на Украина можеби и треба друг лидер доколку Зеленски не ги исполни барањата на САД.
„Нешто мора да се промени. Или треба да се вразуми и да се врати на преговарачката маса во знак на благодарност или некој друг треба да ја води земјата во таа насока“, изјави тој.
