„Лукоил“ доби понуда од компанијата Gunvor Group Ltd. за купување на своите меѓународни активи, стои на веб-страницата lukoil.com.
Клучните услови на трансакцијата биле претходно договорени од двете страни.
Од своја страна, „Лукоил“ ја прифати понудата, обврзувајќи се да не преговара со други потенцијални купувачи.
Склучувањето на обврзувачкото договорно решение за трансакцијата зависи од исполнување на претходни услови, вклучувајќи добивање дозвола од OFAC од Купувачот, како и сите други применливи лиценци, дозволи и одобренија во другите релевантни јурисдикции. Доколку е потребно, страните планираат да аплицираат за продолжување на постоечката лиценца од OFAC и сите дополнителни лиценци, со цел да се обезбеди непречено работење на меѓународните активи и нивното банкарско работење до завршувањето на трансакцијата, се наведува во официјалното соопштение.
Gunvor Group Ltd. е регистрирана во Швајцарија и е основана од Торбјорн Тернквист и рускиот олигарх Генадиј Тимченко, близок до Кремљ.
Тимченко е на листата на санкционирани лица од САД, ЕУ, Велика Британија, Швајцарија, Канада, Јапонија и Австралија.
Ден пред да стапат на сила американските санкции за Тимченко во 2014 година, тој го продал својот удел на својот партнер, за да ја заштити компанијата. Од тогаш, фирмата тврди дека нема врски со Русија.
Генадиј Тимченко се наоѓа на листата на санкции на ЕУ против руски државјани. За него се наведува дека одамна го познава претседателот на Русија, Владимир Путин, и дека генерално се смета за едно од доверливите лица на Путин.
Тимченко се користи од своите врски со лица кои донесуваат одлуки во Русија. Тој е основач и акционер на Volga Group, инвестициона група со портфолио во клучни сектори на руската економија, која значително придонесува за развојот на руската економија.
Тој е и акционер на Bank Rossiya, сметана за лична банка на високи функционери во Русија. По незаконската анексија на Крим, Bank Rossiya отвори филијали во Крим и Севастопол, со што го зацврсти интегрирањето на регионот во Русија.
Дополнително, Bank Rossiya има значително учество во National Media Group, која контролира телевизиски станици кои активно ги поддржуваат политиките на руската влада за дестабилизација на Украина.
Gunvor Group Ltd. е мултинационална компанија за трговија со енергетски суровини, регистрирана во Кипар, со претставништво во Женева, како и деловни канцеларии во Сингапур, Хјустон, Стемфорд, Лондон, Калгари и Дубаи, плус мрежа од претставништва ширум светот.
Според информациите, Генадиј Тимченко и Торбјорн Тернквист започнале соработка во 1997 година, а во 2000 година формално го основале Gunvor, компанија именувана по мајката на Тернквист. Во 2003 година, компанијата започнала со работа во Женева.
