Вчерашниот „Марш на ангелите“ повторно го отвори прашањето за одговорноста и човечноста во судските постапки поврзани со трагедијата во кочанската дискотека „Пулс“, во која животите ги загубија 63 млади луѓе.
Стотици граѓани, роднини и пријатели на загинатите се собраа во тивка поворка, носејќи фотографии — симболи на незгаснатата болка и надеж за правда.
Најемотивниот момент го обележа сведоштвото на Александар Наунов, татко на трагично загинатата Надица. Пред медиумите тој ја сподели својата длабока болка и разочараност од текот на судскиот процес.
„Првото рочиште го дочекавме со надеж. Второто го дочекавме со треперење, а го испративме со тешко разочарување,“ рече Наунов, нагласувајќи дека секое ново одложување е нов удар за родителите кои веќе живеат со ненадоместлива загуба.
Тој посочи и на недостатокот од организација и чувствителност во однесувањето на институциите, истакнувајќи дека родителите биле ставени лице в лице со обвинетите, без минимална подготвеност или заштита. „Како да сме еднакви страни во нечиј административен записник, а не родители што ги изгубија своите деца“, додаде со горчина.
Наунов апелираше до правосудните институции да покажат професионалност, сериозност и пред сè — човечност. Тој нагласи дека родителите очекуваат да се утврди одговорност за сите пропусти, вклучително и оние кај службите што имале обврска да спречат ваква трагедија.
„Нашите деца нема да се вратат, но за нив, за нивното име и спомен, ние нема да престанеме да бараме вистина и правда,“ истакна Наунов, додавајќи дека борбата не е само лична, туку општествена.
На крајот од својот говор, тој побара итна правда за сите 63 жртви на пожарот и изрази благодарност до граѓаните кои ги поддржуваат родителите во нивната мисија: „Заедно ќе ја добиеме правдата!“
