Нов смртен случај од западнонилска треска е потврден денеска, со што бројот на починати во земјава се искачи на шест, соопштија здравствените власти.
Станува збор за 72-годишен маж од Аеродром, кој бил хоспитализиран пред 15 дена со тешка клиничка слика.
Болеста бележи нагорен тренд, со повеќе од десет новозаразени за една седмица. Од вкупно 53 регистрирани случаи досега, 50 се лабораториски потврдени, а за три се чекаат резултатите од дополнителните тестирања.
На Клиниката за инфективни болести во Скопје моментно се хоспитализирани 18 пациенти. Најмладиот, 26-годишен пациент, е во добра состојба, додека петмина се на одделот за интензивна нега со тешка клиничка слика и сите се повозрасни лица.