Милијардер доби дозвола да копа приватен тунел под Салцбург, граѓаните бесни!

Порше побарал и добил дозвола од градот Салцбург да ископа приватен тунел под Капуцинерберг.

Во 1917 година, на врвот на својата слава, австрискиот писател Стефан Цвајг купил палата позната како Пашингер Шлесл на Капуцинерберг, рид со поглед на Салцбург. Му се допаѓала оваа дискретна вила, која Моцарт еднаш ја посетил, бидејќи била „романтична, непрактична“ и, што е најважно за него, „непристапна за автомобили“.

Таму ги напишал своите најпознати романи и живеел до 1934 година, кога антисемитскиот бран предизвикан од подемот на нацизмот во Германија го принудил да ја продаде куќата под нејзината цена. Години подоцна, во егзил, Цвајг го споменал местото во своето ремек-дело „Вчерашниот свет“, опишувајќи го како „шуместа висорамнина, речиси како последниот бран на Алпите“, до која се стигнувало „со искачување од повеќе од сто камени скали“.

Поминало повеќе од еден век. Но, новиот сопственик на Пашингер Шлесл има сосема различни планови. Волфганг Порше, 82-годишниот наследник на истоимената автомобилска династија која ги поседува брендовите Фолксваген и Порше, од кои е најголем акционер и претседател на Надзорниот одбор, ја купи вилата во 2019 година за 9 милиони евра. Оттогаш, тој започна темелно реновирање, кое треба да биде завршено за неколку месеци и конечно ќе им овозможи нему и на неговата сопруга, принцезата Габриеле цу Лајнинген (исто така позната како Инаара Бегум, поранешната сопруга на Ага Кан), да уживаат во своето луксузно повлекување, пишува „Кориере дела Сера“.

Меѓу новите доградби е и подземна гаража, доволно голема за да собере осум автомобили на милијардерот.

Дозвола за тунел

Сето ова би било непроблематично да не беше скандалот што следеше. Порше, всушност, побара и доби дозвола од градот Салцбург да ископа приватен тунел под Капуцинерберг што директно ќе го поврзува центарот на градот со гаражата на вилата. Причината: возењето по тесниот пат што води до Шлесл, особено во зима, наводно е многу тешко.

Но, дури и во Салцбург, градот на богатите и славните, проектот за тунелот се сметаше за прекумерен и арогантен.

Граѓаните се побунија против идејата. Додека работата веќе беше започната, 20.000 жители потпишаа петиција со која се осудува „преференцијалниот третман на супербогатите, симбол на социјална неправда“ и се бара проектот да биде запрен.

„Не сакаме“, пишуваат граѓаните, „милијардер од Порше да сече низ рид за да пристапи до својата приватна гаража користејќи јавен имот“, кој е исто така заштитено природно подрачје.

Смешно ниската такса што Порше ја плати за користење на јавно земјиште – само 48.000 евра – исто така беше критикувана.