Глобалните инвестиции во обновлива енергија се покажаа како неплодни и светот треба да се фокусира на сигурно снабдување со фосилни горива, изјавија оваа недела американските министри за енергија и внатрешни работи, обидувајќи се да ја убедат Европа да купува повеќе американска нафта и гас, објави денес Ројтерс.
САД станаа водечки европски снабдувач на нафта и гас, а американските компании се стремат да го зголемат тој удел во време кога Европската Унија сака целосно да го запре преостанатиот увоз на руски енергетски производи.
Пораката од американските претставници на енергетската конференција во Атина оваа недела нагласува промена во политиката на САД под администрацијата на Трамп, која ги олабави еколошките прописи и ја истакна „доминацијата“ на нафтата и гасот како централен двигател на американската економија и меѓународното влијание.
„Едноставно не функционира“, рече американскиот министер за енергетика Крис Рајт за преминот кон обновлива енергија на конференција, каде што американските компании објавија договори за снабдување и дупчење за гас во Европа.
Тој посочи дека светот потрошил помеѓу четири и осум трилиони долари за поврзување на соларни и ветерни фарми со мрежата, но дека минатата година ваквите извори сè уште претставувале само 2,6 проценти од глобалната енергија.
