Белгиската полиција ги ослободи поранешната висока претставничка на ЕУ, Федерика Могерини, и поранешниот шеф на европската дипломатска служба, Стефано Санино, од притвор, откако беа приведени на сослушување како дел од истрагата за можна измама, соопшти Канцеларијата на европскиот јавен обвинител во среда наутро.
Могерини, која е ректор на Колеџот на Европа, Санино, и неименуван вработен во колеџот беа приведени во вторник како дел од истрагата за тоа дали јавниот тендер спроведен од Европската служба за надворешни активности (ЕЕАС) во 2021-2022 година за избор на високообразовна институција која ќе биде домаќин на Дипломатската академија на ЕУ бил наместен во корист на Колеџот на Европа.
„Обвиненијата се однесуваат на измама и корупција во јавните набавки, судир на интереси и кршење на професионална тајна. Тие беа ослободени бидејќи не се смета дека се изложени на ризик од бегство“, се вели во соопштението на обвинителството.
Обвиненијата сè уште не се докажани, а Могерини, Санино и трето лице приведено во истрагата се сметаат за невини сè додека судот не одлучи поинаку, според Политико.
