Централниот регистар го запиша новото трговско друштво „КОНСТАНТИН ЕНЕРЏИ ДОО Скопје“, чија примарна дејност ќе биде производство на електрична енергија од обновливи извори, објави Призма.
Друштвото е основано на 27 јуни 2025 година, а регистрацијата е одобрена на 4 август. Седиштето се наоѓа на улицата „Гане Тодоровски“ во центарот на Скопје.
Како сопственици се јавуваат две различни субјекти:
„ПЕЛА ГЛОБАЛ ЛИМИТЕД“ од Перт, Австралија,
Македонската православна црква – Охридска архиепископија – Скопје.
Основната главнина на компанијата изнесува 5.000 евра, од кои сè уште не е уплатен ниту еден дел. Компанијата е заведена како „микро“ субјект, со мешовит капитал, и неограничено времетраење.
За управител е назначен Николчe Јовановски, кој живее во Викторија, Австралија. Тој има неограничено овластување за внатрешно и надворешно застапување на друштвото.
Ова не е прв влез на МПЦ-ОА во енергетскиот сектор, потсетува Призма.
Во 2020 година МПЦ-ОА заедно со три физички лица и друштвото „Мелничко-пекарска индустрија Жито Караорман“, ја основаа хидроцентралата „Драгов дол“ од Кичево.
Две години подоцна, во 2022, МПЦ-ОА влезе како содружник во фирмата „Тринити солар“, која исто така е регистрирана за производство на струја.