Повисоки плати, нов колективен договор и системско решение за професионалните војници кои навршуваат 45 години се дел од промените што ги најави Министерството за одбрана. Министерот Владо Мисајловски соопшти дека зголемувањето на платите во Армијата и Министерството треба да започне од 1 јануари, а решението за статусот на војниците веќе поминало на владин колегиум и наскоро ќе се најде на седница на Владата.
Најавите беа соопштени на свеченоста по повод Денот на Командата за операции, одржана во касарната „Боро Менков“ во Куманово, на која присуствуваа и претседателката и врховен командант на Армијата, Гордана Сиљановска-Давкова, началникот на Генералштабот Сашко Лафчиски, пратеници, дипломати и одбранбени аташеа.
Мисајловски ѝ се заблагодари на претседателката за поддршката, како и на раководството на Генералштабот и на вработените во Министерството за одбрана за нивниот ангажман во спроведувањето на реформите.
Тој информираше дека за време на неговиот мандат биле исплатени над 26 милиони евра по основ на судски тужби од 2019 и 2020 година, додавајќи дека паралелно се реализираат и обврските што произлегуваат од колективниот договор.
Нов колективен договор со синдикатите
Министерот најави дека во претстојниот период ќе биде потпишан нов колективен договор со синдикатите, при што, како што рече, ќе бидат разгледани нивните предлози.
Мисајловски уверува дека постојните права на вработените нема да бидат загрозени со новиот договор и дека целта е да се продолжи со унапредување на условите за работа и статусот на припадниците на одбраната.
Во однос на набавките, тој посочи дека обврските за новата опрема и возилата од типот „Страјкер“, како и за хаубиците, се реализираат редовно и дека предвидените плаќања се извршуваат.
Дополнително, најави дека во рамки на договорот со италијанската компанија „Леонардо“ се очекува следниот месец да пристигнат два нови хеликоптери.
Системско решение за професионалните војници над 45 години
Една од клучните најави се однесува на професионалните војници кои навршуваат 45 години, за кои подолг период се бараше трајно решение за продолжување на нивниот професионален ангажман.
Мисајловски соопшти дека решението е подготвено во соработка со началникот на Генералштабот, синдикатите, директоратите и припадниците на Армијата. Според него, предлогот веќе поминал на колегиум во Владата и се очекува да биде разгледан на владина седница следната недела.
„Ниту еден од вас што навршува 45 години нема да биде заборавен, тука ќе му биде местото во Армијата и ќе остане сѐ до неговото пензионирање“, порача министерот.
Тој најави дека по усвојувањето на решението, за деталите ќе бидат информирани професионалните војници, заедно со началникот на Генералштабот.
На крајот од обраќањето, Мисајловски истакна дека Министерството ќе продолжи да инвестира во опрема, средства и подобри примања за армиските припадници, нагласувајќи дека тие ја имаат неговата целосна поддршка.
Со најавените мерки, Министерството за одбрана планира да ги унапреди материјалниот статус на вработените, условите за работа и долгорочната сигурност на професионалните војници.