Околу 1.400 туристи беа евакуирани од Мачу Пикчу поради протест во областа на познатото археолошко наоѓалиште во Перу, објави агенцијата Франс Прес, повикувајќи се на властите.
Демонстрантите кои бараа нова компанија да ја преземе автобуската линија помеѓу најблиската железничка станица и Мачу Пикчу се судрија со полицијата. Четиринаесет полицајци беа повредени додека расчистуваа блокада на патот.
Властите успеаја да евакуираат околу 1.400 туристи, но 900 други останаа заглавени во областа.
Закажан е состанок меѓу владини претставници и синдикати во обид да се најде решение што ќе ги задоволи демонстрантите.
Мачу Пикчу, место на светското наследство на УНЕСКО од 1983 година, пречекува просечно 4.500 луѓе дневно, од кои многумина се странци, според официјалните бројки.