Во центарот на Скопје утре, 23 октомври, ќе биде воведен посебен сообраќаен режим поради одржувањето на атлетската трка „23 Октомври“, која ќе започне во 8 часот наутро.
Од Министерството за внатрешни работи информираат дека сообраќајот ќе се пренасочува по околните улици, во зависност од движењето на учесниците на трката.
Стартот на трката е предвиден пред паркот „Жена Борец“, од каде што натпреварувачите ќе се движат по улицата „11 Октомври“, ќе поминат низ плоштадот „Македонија“ и ќе продолжат преку Камениот мост.
Потоа трасата продолжува по улицата „Иљо Војвода“, преку тротоарот на мостот „Гоце Делчев“ и по кејот на реката Вардар.
Учесниците ќе се враќаат по истата патека, а целта ќе биде поставена пред споменикот на основачите на ВМРО во паркот „Жена Борец“.
Поради спортскиот настан, се очекуваат привремени ограничувања и пренасочувања на сообраќајот во централното градско подрачје.
МВР апелира до возачите и пешаците да ги почитуваат насоките и наредбите на полициските службеници, со цел безбедно одвивање на трката и непречено регулирање на сообраќајот.