Аргентина го направи најзначајното откритие на злато, сребро и бакар во последните три децении, објави „Индијан дефанс ривју“. Се проценува на околу 337 милијарди долари и се наоѓа во планинските делови на покраината Сан Хуан.
Проектот се реализира од компании кои ја подготвуваат експлоатацијата на ресурсот и неговото пласирање на светскиот пазар. Иако Јужна Америка одамна е позната по својот богат рударски потенцијал, ова ново откритие во Аргентина означува нова фаза. Геолозите утврдиле дека наоѓалиштето содржи над 80 милиони унци благородни метали (односно 2268 тони), како и повеќе од 12 милиони тони бакар – сето тоа со пазарна вредност од околу 337 милијарди долари. Тоа го прави не само најголемото откритие од ваков обем во последните години, туку и исклучително перспективен ресурс кој може да ја претвори Аргентина во еден од водечките светски извозници на бакар и благородни метали.
„Големината на наоѓалиштето е речиси невозможно да се опфати со обични економски проценки. Неговата вкупна вредност може да ја промени целокупната економска насока на Аргентина. Земја која традиционално се потпира главно на извоз на земјоделски производи, сега се соочува со можноста да ја трансформира својата економија на начини кои досега изгледаа немисливи“, се наведува во анализата.
Откритието доаѓа во време на значително зголемување на светската побарувачка за бакар, особено во контекст на индустрии како електрични возила и обновливи извори на енергија. Во услови на глобален стремеж кон поеколошки технологии, потребата од бакар станува сè повитална. Новото откритие ја позиционира Аргентина како значаен актер во транзицијата кон зелена енергија. Како потенцијален водечки производител на бакар, земјата може да ја намали зависноста од традиционалните добавувачи како Чиле и Перу, нудејќи конкурентни цени и постабилни испораки – нешто особено вредно за развиените економии кои бараат сигурни извори на минерали во услови на геополитичка нестабилност.
Паралелно со тоа, неодамна беше објавено и ново откритие на злато во некогашната затворена рударска област Доропо, сместена во североисточниот дел на Кот-д’Ивоар. Компанијата одговорна за развојот тврди дека рудникот има потенцијал за производство од над 100 тони. Проектот предвидува градежни активности во период од две години, кои започнуваат на почетокот на 2026 година, и веќе е обезбеден со инвестиции во вредност од неколку милијарди долари.
