Неидентификувани вооружени напаѓачи убија 18 лица, вклучително и градоначалникот, кога вчера отворија оган во градското собрание во југозападната држава Гереро, која е погодена од насилство од бандите, соопштија властите.
Меѓу убиените во Сан Мигел Тотолапан се градоначалникот Конрадо Мендоза, неговиот татко и поранешен градоначалник Хуан Мендоза и други локални функционери, се вели во соопштението на државата Гереро. Ранети се уште две лица.
Се судрија ривалските банди?
Заменик-министерот за безбедност Рикардо Мехија посочи дека насилството произлегло од конфликтот меѓу ривалските групи Ла Фамилија Мичоакана и Лос Текилерос. Говорејќи на редовна владина прес-конференција, тој рече дека е во тек операција за пронаоѓање на сторителите, а истражителите проверуваат видео на кое се чини дека Лос Текилерос ја презема одговорноста за убиствата.
Мексиканскиот дневен весник „Ел Универзал“ претходно објави дека вооружените лица се чини дека извршиле координирана серија напади во зградата за да го убијат градоначалникот.
Во меѓувреме, во централната држава Морелос, државната претставничка Габриела Марин беше застрелана, а нејзиниот телохранител беше ранет вчера вечер пред аптека, рече Мехија.
