Неексплодирана артилериска граната калибар 155 милиметри, тешка околу 45 килограми и потекло од Првата светска војна, е пронајдена во атарот на селото Пепелиште, Општина Неготино, и успешно е отстранета од екипите на Дирекцијата за заштита и спасување (ДЗС).
Поради непристапниот терен и локацијата на опасното средство во коритото на реката Вардар, интервенцијата била спроведена во сложени услови. Со логистичка поддршка од Територијалната противпожарна единица Неготино (ТППЕ), која обезбеди чамец за пристап до местото, пиротехничар на ДЗС безбедно ја извлече гранатата.
По извлекувањето, гранатата била транспортирана, обезбедена и предадена за конечно уништување на Армискиот полигон „Криволак“.
Од Дирекцијата апелираат до граѓаните доколку забележат сомнителни експлозивни средства, да не ги допираат или поместуваат, туку веднаш да пријават на единствениот бесплатен број за итни случаи 112.