Израелскиот премиер Бенјамин Нетанјаху му кажа на својот катарски колега дека Израел нема планови повторно да го наруши суверенитетот на Катар, откако претходно овој месец нападна претставници на Хамас во Доха.
Во соопштението од кабинетот на израелскиот премиер се вели дека Нетанјаху во телефонски разговор со катарскиот премиер потврдил дека истото му го ветил на американскиот претседател Доналд Трамп и изразил жалење за смртта на катарски државјанин во нападот врз Доха.
Министерството за надворешни работи на Катар објави дека Нетанјаху ветил дека нема повторно да го напаѓа Катар во иднина, во телефонски разговор со катарскиот премиер и американскиот претседател Доналд Трамп.
Бела куќа: Тоа беше трилатерален телефонски разговор
Белата куќа во соопштението наведува дека Нетанјаху му изразил жалење на катарскиот лидер за израелскиот напад во Доха, во трилатерален телефонски разговор со Доналд Трамп. Белата куќа соопшти дека Нетанјаху, исто така, изразил жалење за кршењето на суверенитетот на Катар од страна на Израел и „потврдил дека Израел нема повторно да изврши таков напад во иднина“.
„Лидерите разговараа за предлогот за завршување на војната во Газа, перспективите за побезбеден Блиски Исток и потребата од поголемо разбирање меѓу нивните земји“, соопшти Белата куќа пред прес-конференцијата во Белата куќа меѓу Трамп и Нетанјаху.