Големите количини дожд што попладнево ја зафатија Битола предизвикаа сериозни проблеми во нормалното функционирање и сообраќајот во неколку делови од градот. Од Општина Битола информираат дека сите расположливи екипи на ЈКП „Нискоградба“ се веднаш излезени на терен и активно работат на санирање на штетите.
Поради неможноста на одводната мрежа одеднаш да ја прими огромната количина вода, јавната локална самоуправа соопшти дека се извршени итни интервенции на клучни и критични точки во градот и приградските населби.
- Градски населби и главни улици: Екипите реагираа во населбата „Стрелиште“ на улицата „8 Септември“ (кај бензинската станица на „Лукоил“), на дел од улица „Партизанска“ пред Медицина на трудот, како и на улиците „Бурса“ и „Цар Самоил“.
- Поплавени потези околу „Железничка“: Проблеми со надојдена вода се забележани во населбата Карпош-Кланица на потегот кон улица „Железничка“, како и на самата улица „Железничка“ кај објектот „Император“.
- Канали и речни корита: Исчистен е одводниот канал на улица „Крте Нале“ во Горно Оризари, Раштанскиот порој, а се интервенираше и на реката Курдерес во населбата „Стрчин“, како и на стариот Курделес кај улицата „Васко Карангелевски“ (излезот кон „Смилевски конгрес“).
- Притисок од сливните води: Во населбата „Баир“ и на улицата „Широка“ уличните решетки не можеа да ја соборат водата што се свлекуваше од ридот, поради што беа извршени брзи комунални зафати. Помали интервенции имало и во населбата „Бадембалари“.
Од Општина Битола додаваат дека екипите на „Нискоградба“ остануваат на терен со механизација до целосно нормализирање на состојбата. Во тек се и дополнителни интервенции на патните правци кои водат кон околните населени места Раштани, Брусник и Лавци, каде невремето исто така нанело кал и вода на коловозите. Локалните власти апелираат до возачите на зголемена претпазливост низ градските сообраќајници.